Во организација на ЕУ инфо центарот-Скопје и ЕУ инфо точката на Општина Велес, во соработка со ЕД „Вила Зора“, на  29 јануари годинава, во просториите на општината се одржа предавање посветено на климатските промени и потенцијалите на алтернативните енергии. Предавањето го одржа д-р. Ненад Коциќ, претседател на Еколошкото друштво „Вила Зора“. Присутните ученици од основните училишта во општината имаа можност да слушнат информации за негативните ефекти на глобалното затоплување и климатските промени и да дознаат нешто повеќе за можностите за користење на ветрот и сонцето како алтернативни извори на енергија во битката против глобалното затоплување.

По предавањето се одржа работилница на која учениците напишаа свои размислувања и пораки и  симболично ги закачија на ветерница. Целта на предавањето беше да се поттикнат младите генерации на креативно размислување и понатамошни активности за подобрување на животот во својата локална заедница и глобално, планетата.