Општина Велес и Општинската организација на Сојузот на борците од   НОАВМ Велес по повод 2 Август, Националниот празник на македонскиот народ – 107 годишнината од Илинденското востание и 66 годишнината од Првото заседание на АСНОМ,  Ве покануваат на

ЧЕСТВУВАЊЕ НА ДВАТА ИЛИНДЕНА

2 Август 2010 (понеделник)

9:00  Положување цвеќе и оддавање почит на загинатите борци
Место:       Спомен-костурница

9:30     Положување цвеќе и оддавање почит на Велешките Илинденци
Место:       Споменик на Велешките Илинденци

Превозот е организиран во 8:30 пред Трговски центар и Стоковна куќа

На 27 јули стартуваше првата манифестација од проектот на Министерството за култура Топол култирен бран 2010 во Велес.
Во организација на  Општина Велес оваа манифестација чија основна цел да ги доближи сите облици на културно создавање до сите граѓани, првата вечер   се одржа во два дела.
Во Ликовниот салон беше претставен културен триптих – изложба, промоција и концерт.
Изложбата на младиот сликар Јован Наумоски е приказ на детството на африканските деца низ фотографски филм со 36 пози. Промоцијата на книгата „Чоколада во портфолио“ на авторот Звонко Танески ја промовираа  проф.Анѓелина Бановиќ и проф. Маја Чипишевска Мојсова. Според нив станува збор за поезија – десерт за душата, што се конзумира  за засилување на чувствата. Врв на уметничкото доживување беше концетот на пијанистите Габриела Бачманова – Димовска и Илија Настовски кои исполнија дела од Дворжак, Григ и Пјацола.

Во рамките на ИФАД „Стоби“, на 27-ми јули годинава ансамблот на велешкиот Народен театар „Јордан Хаџи Константинов“ –Џинот во преполниот антички театар ја изведе претставата „Баханалии“ на Горан Стефановски во режија на Наташа Поплавска. Публиката со овации и долготраен аплауз ја награди актерската екипа предводена од Васил Зафирчев во улогата на Дионис и  Маја Љутков во улогата на Пентеј . Актуелноста на текстот на Стефановски кој прозвучи како шлаканица и крик за отрезнување на сите општества од Дионис до денес, го привлече вниманието на публиката. „Ќе ви дадам оган, ваша работа е дали ќе ја стоплите или ќе ја запалите куќата“, порача Дионис во претставата. Во изјавата за медиумите Васил Зафирчев изрази задоволство што по подолго време настапи во Стоби со претстава што допре до публиката.

Во рамките на одбележувањето на 107 години од Илинденското востание, Здружението на граѓани „Илинденски марш 1978 година“ по 32-ри пат го организира традиционалниот Илинденски марш. На пат кон Крушево, на 28 јули годинава (среда), во 19 часот, коњаниците на Илинденскиот марш ќе пристигнат во Велес. Настанот ќе биде организиран во центарот на Велес, крај споменикот на велешките илинденци (споменик –коњаник), каде ќе бидат положени букети цвеќе. По тој повод ќе биде организирана пригодна културно-уметничка програма. Општина Велес Ве поканува со Вашето присуство да го поддржите 32-от Илинденски марш во пресрет на најголемиот празник на македонскиот народ-Илинден